బీరపాదు కాయలు కాయడం మొదలుపెట్టింది.ఈరోజు ఒక బీరకాయ కోసాను.ఒక్క బీరకాయతో ఏమి చేయాలా అని ఆలోచిస్తుంటే,నూనె వంకాయలాగా చేస్తే ఎలా ఉంటుందా అన్న ఆలోచన వచ్చింది.చేశాక బాగా కుదిరింది.
కావలసిన పదార్థాలు
బీరకాయ – 1
ఉల్లిపాయ – 1చిన్నది
టమాటా – 1 చిన్నది
చనిక్కాయలు (వేరుశనగ గుళ్ళు) – 2 టేబుల్ స్పూన్
ధనియాలు – 1 టీ స్పూన్
నల్ల నువ్వులు – 1 టెబుల్ స్పూన్
ఎండు కొబ్బరి – కొంచెం
అల్లం – చిన్న ముక్క
వెల్లుల్లి పాయలు – 4-5
కారం -తగినంత
పసుపు – కొద్దిగా
గరంమసాలా పొడి – కొద్దిగా
ఉప్పు – తగినంత
నూనె – 2 టేబుల్ స్పూన్లు
పొయ్యి వెలిగించి,మందపాటి పాత్రలో నూనె లేకుండా చనిక్కాయలు వేయించాలి.చనిక్కాయలు సగం వేగాక ధనియాలు,నువ్వులు కూడా వేయాలి.ఇవన్నీ వేగాక ఎండుకొబ్బరి కూడా వేసి దింపెయ్యాలి.
ఇవన్నీ చల్లారాక చింతపండు,కారం,ఉప్పు,గరంమసాలా పొడి కూడా వేసి పొడి చేసుకోవాలి.
ఈ పొడిలోనే ఉల్లిపాయ ముక్కలు,టమాటా ముక్కలు,అల్లం,వెల్లుల్లి,పసుపు వేసి కొద్దిగా నీళ్ళు పోసి మెత్తగా నూరుకోవాలి.
ఇప్పుడు బీరకాయ చెక్కుతీసి,వేలెడు ముక్కలుగా తరుక్కోవాలి.ఈ ముక్కల్ని నాలుగు ముక్కలుగా విడిపోకుండా గుత్తిలాగా వచ్చేలా కోసుకోవాలి.ఈ గుత్తిలోకి నూరి పెట్టుకున్న మసాలా కూరుకోవాలి.
బీరకాయలు కొద్దిగా మగ్గాక నూరిపెట్టుకున్న మసాలాలో తగినంత నీళ్ళుపోసి,ఉడుకుతున్న బీరకాయ ముక్కల్లో పోయాలి.
బీరకాయ ముక్కలు బాగా ఉడికి,గ్రేవీ దగ్గర పడ్డాక దింపెయ్యాలి.
వేడి వేడి అన్నంలోకి కానీ,చపాతీ,రొట్టెల్లోకి కూడా చాలా రుచిగా ఉంటుంది.
పెరటితోట 
నోరూరుతోంది 🙂
కనీసం ఒకరికైనా నోరూరించగలిగినానంటే నా ప్రయత్నం సఫలమైనట్టే 🙂
మీ స్పందనకు ధన్యవాదాలు.
గుత్తి వంకాయ సోదరుడిలా గుత్తి బీరకాయ… భలే ఉందండీ. టైం దొరికినప్పుడు ప్రయత్నిస్తాం ఈ డిష్ ని 🙂
అవునండి గుత్తివంకాయ సోదరుడే :-),మన వైపు చేస్తారే నూనెవంకాయ అని ,అదే మసాలా వాడి చేసాను.
నా చిన్నప్పుడు మా అమ్మ కేరెట్ సైజు బీరకాయలను పొట్టు తీసి, మసాలా పెట్టి గుత్తి వంకాయలా వండేది-బాగుండేవి. ఆ సైజు బీరకాయలు మర్కెట్ లొ దొరకటం కష్టం అవటం వలన ప్రయత్నించలేదు. మీరు చూపించిన గుత్తి బీరకాయ విధానం బాగుంది – ప్రయత్నించాం రుచిగా కూడా ఉంది. తెలియజేసినందుకు ధన్యవాదాలు.
ప్రయత్నించి చూడడమే కాకుండా,ఎలా వచ్చిందో కూడా చెప్పినందుకు చాలా ధన్యవాదాలండి.