చిన్నుల్లిపాయల పులుసు

ఈ చిన్నుల్లిపాయలు మా ప్రాంతంలో దొరకవు.మొన్నా మధ్య రిలయన్స్ మార్కెట్‌కి వెళ్తే కనపడ్డాయి.సరే ఏదో ఒక ప్రయోగం చేద్దాం అని కొనుక్కొచ్చాను. ఈ ఉల్లిపాయల్తో పులుసు పెట్టాను.బాగ వచ్చింది.

కావలసిన పదార్థాలు
చిన్నుల్లిపాయలు – 30
వెల్లుల్లిపాయలు – 6-7
అల్లం – అంగుళం ముక్క
ధనియాల పొడి – 3/4 టీ స్పూన్
జీలకర్ర పొడి – 1/2 టీ సూన్
మెంతి పొడి – చిటికెడు
బియ్యం పిండి – 1 టేబుల్ స్పూన్
చింతపండు – చిన్న నిమ్మకాయంత
బెల్లం – చిన్న ముక్క
కారం – తినే కారానికి సరిపడా
ఉప్పు – తగినంత
పసుపు – చిటికెడు
నూనె – 1 టేబుల్ స్పూన్
పోపు సామాగ్రి

పొయ్యి వెలిగించి మందపాటి పాత్రలో నూనె వేసి వేగాక,ఆవాలు,జీలకర్ర,మెంతులు,వెల్లుల్లి,ఎండుమిరపకాయలు,అల్లం ఒకదాని తర్వాత ఒకటి వేస్తూ మాడకుండా వేయించాలి.ఒలిచి పెట్టుకున్న చిన్నుల్లిపాయలు కూడా వేసి కొంచెం సేపు వేపాలి.

ఇప్పుడు కారం,పసుపు,ధనియాల పొడి,జీలకర్ర పొడి,మెంతి పొడి కూడా వేసి బాగా కలపాలి.

చింతపండును తగినన్ని నీళ్ళలో నానబట్టి రసం తీసి ఉంచుకోవాలి.మసాల పొడులన్నీ వేశాక మాడకుండా వేయించి అందులో చింతపండు రసం,నీళ్ళు పోసి ఉడికించాలి.కొంచెం ఉడికాక ఉప్పు,బెల్లం ముక్క కూడా వేసి ఉల్లిపాయలు ఉడకనివ్వాలి.

పులుసు చిక్కబడ్డాక దింపెయ్యాలి.